Lewnis At Mangellat : Macahu !

Zik wa ihedder-itt i wayed

assa d lkaγed

a tt-id-afen ineggura

Tagi d tatteftart tamezwarut i d-yuran s teqbaylit sγur wegraw iwumi qqaren Wellili (Volubilis).

Гurneγ isem-agi yesεa lmeεna : Wellili d ssbeh neγ d tafrara. A wi yufan dγa tafrara-yagi a tt-id-tedfer tafukt n yitij ara d-yessufγen tameslayt nneγ si ttlam !

Takemmict imeslayen-agi mačči d awal kan, d acdad ubernus n leεnaya i d-ssutren At Wellili dgi, fkiγ-asen-tt. Nnan-iyi-d : muqel i wudem n temzi, ur texdim ara ! yerna leεnaya d asalas n teqbaylit, win tt-izeglen, yeffeγ irebbi n at yegrawen d at wurawen !

Arbaε-agi mεerrden i lmuhal, bγan ad ssnetqen arraw n yeγriben s tmeslayt n lejdud-nsen, nnan-ak/am ma nerra-d awalen-agi γer trumit, arrac imectuhen iwumi tura tetteftart-agi, ad ğğen taqbaylit a tt-γren kan s trumit. Dimi at Wellili ttemhelbaben d leεğeb, nnan-ak : sya d tasawent arrac ilaq ad ssentaqen tameslayt nsen.

D ayen nwala, dacu ssnen warrac n yeγriben di teqbaylit ? Ur d-izad wara: Deg-qerra nsen ccetthen yismawen am wid n seksu, tabexsist, tazemmurt, taddart, tameγra, ccdeh... Iles nsen iserreh γer tmeslayin nniden, ma d tin n lejdud nsen ttun-tt, ameεni akken i s-neqqar : .leεwayed n wiyad sehlent, ma tessned tid n yaya-k.. Win ur nessin tameslayt-is d wayen akk d-icudden γers, am win ur nettid γer yemma-s!

MACAHU !

Di tazwara llant tmucuha : anwi ur d-nekkir yissent ? Anwi ur tezzuzen taγect n yemma-s neγ n yaya-s ? Timucuha mačči d asedhu kan, d leqraya i imectuhen, i imeqranen. Win (neγ tin) i tent-idyettawin, yettheggay aqcic neγ taqcict (t)amectuh(t) i uqabel n ddunnit. Weγzen, teryel neγ ajedεun d iεekkuren d wayen yakk i d-yesqittiεen i tirga n yal yiwen degneγ.Tiherci n Briruc neγ n Belεejjud temmal-aγ-d amek a nfel akin i iεerriden.

Timucuha d awal d-ğğan imezwura, d agerruj i ileqqem baba-s i mmi-s seg wass mi tebda yemma-s n ddunnit. Ur nesεi ara ssrayat, ameεni yella wawal, yuγal d ayefki nneγ, win i t-yettden yerwa-t, yettuγalas d ifadden. Ma d win t-yeğğan, yuγal d lwehc, d waγzen n tezgi ur nesεi leqrar, ihebbej deg yemdanen ur t-id-necbi, ur nedfir lğerra-s.Taqbaylit tezda s tmucuha, s isefra, s yezran d yezlan. Yal nnehta tellem d asefru, yal tudert tleqqem d timεayin.

Tameslayt nneγ, tamusni nneγ am tfunast igujilen ur tettnuz ur trehhen.

Lewnis At Mangellat

Tazwart i wafus n tmucuha i welmad n teqbaylit

n Madjid Allaoua

http://www.mondeberbere.com/langue/allaoua/extrait.pdf