Amar Mezdad : Tagrest Urγu

SALEM

Seg-mi i d-kecmen akal n At-Yeğğer, adfel yenna-d ma n-teṭtfeḍ. Nniqal d asxiclew kan, tura ata-n amzun d ibidiyen i d-iγellin, simmal ttalin adrar, simmal yeddal wakal, d tineccarin n taduṭ i d-yettarew. Iḍarren tura terza-d fell-asen taẓayt, d aldun kan i zzuγuren : aten-ad sin isurifen γer zdat, asurif yedda di rrayε. Limer mačči d εeggu εyan, akal ibezgen yerna-yas wedfel ar-d ggalen ar d aḍar i ttakren γer deffir, wiss ma d tuggdi neγ d ulawen i d-yennan kra.
Win yezwaren i d ameqqran-nnsen, amecwar gar-as d wid i d-yeddan yid-es. D netta i sen-yezwaren. Aten-ad wa deffir wa, gan azrar am tweḍfin di tsawent, acu kan tiweḍfin d tiberkanin yerna ttawint ttarant tagella deg imawen, nutni simmal simmal ttimlulen yiwen webrid i âtâtawin, d uzzal i bubben mačči d uffal neγ d tagella.
Aεrur ibubb, ul ẓzay, aḍar deg wedfel la-yessuruf. D tuggdi.
Abγas mačči d win i-wumi ḥman idammen, ayen i d-yusan a-t-iqazem fiḥel ma tergagi taγma, aγesmar yeqqur, agecrir ibedd, ayen i d-yusan yebna fell-as. γas yettruẓ ur ikennu. Amdan yebnan s ddkir mačči s teksumt, mačči d amdan, mmi-s n wergaz d tmeṭṭut d tasa d idammen !
Abγas, d win tdel tuggdi s yifer-is usbik, aẓayan, terra tillas zdat wallen, tagecrirt tulwa, aγesmar la-yettinig iman-is, tasa tebγa ad d-teffeγ dayenni, yeẓra ayen i t-yurğan ahat d ilili ahat d inig aneggaru winna ur d-ngellu s tuγalin, maca yezga yessuruf, yezga iteddu, akken i s-tehwa teffeγ.
Abγas d win Iḥulfan i tuggdi tugar tiγemdin mačči yekna-yas. Abγas d win yuggaden γef uqerru-s netta iεemmed, γas εzizet tudert yella wayen i tt-yugaren, γas εzizit umeslay d unecreḥ yella wayen i ten-yugaren. Ayen aεni yella win yufan tiẓeṭ yeggumma-tt ? Ayen aεni yella win yugin ad yili akken i s-yehwa, ad yawi abrid s talwit ? Yak ulac win yufan rrbeḥ yugi-t, anagar ibki zdat lğefna n sesku ! Aεni yella win yeṛwan tarwa d imawlan, i-mi akka ata-n la-yettegririb di tẓegwin, deg umur ad yeqqim yid-sen nnig ukanun ad yeẓzizen, cwiṭ d ameslay cwiṭ d asefled.
Netta tura wid aεzizen amzun yerra tablaṭ fell-asen, nutni daγen ahat uysen-t, dayen rran-t di tesga n tasa anida ur tt-yesmunddul.
Yeğğa-ten akken γer deffir, γas ur uklalen ass-a yurew-asen-ed lihana, azekka ahat ar-a sen-ed-yernu d imeṭtawen.
Yeẓra Iḍurr-iten, ulac win ar-a sen-ed-yekken deg yimi n tewwurt, ulac win ar-a sen-yessasen tagella mi ar-a llaẓen.
Deg wussan n tegrest akka am wass-a, anwa ar-a sen-ed-izedmen ? Tusa-d nnig yiγil-is, yella wayen i ten-yugaren. Ula d tasa i-wumi-tt ma d ddell kan ar-a d-tagem ?
Ata-n ass-a ger idurar d izuγar, ger tudert d tmettant, γas aḍar iteddu ul ineddu, ur yeẓra melmi ar-a sen-tbedd tikli ad yegzem wemrar wuγur tcudd tudert yellan. Netta iεemmed ; γas akka γer berra amzun tduz tasa, s-sya γer da tezga tessebraq-ed, tettergigi-d, teqqar-as-ed « A kečč i yi-ixedmen akka ! Amek armi i yi-tegreḍ deg tegnitt am ta, nekk yessaramen lehhu tura bḍiγ d wayen urweγ, la-ttquddureγ rennuγ, cedhaγ taḍsa d umeslay ? »
Ansi i s-ed tekka netta yekka-yas ansi nniḍen, amεabber yezga gar-asen, Salem mačči tengugi nniyya-s.
Tura dayen ğğan azaγar, d tiwririn i la-ttalin, mraw i d-igan tarbaεt, d azrar n warraw n tmeṭtut i la-inebbcen di tsawent. Tugett deg-sen knan si tεakkemt yeggten. Ddurt, ur yekkis yiwen wass anagar d tikli, metwal asammer i d-uγalen. Mmuggren at tlisa ad d-awin amur-nnsen deg leslaḥ. Skud yufrar usigna deg igenni, deg uzal gganen, deg yiḍ teddun. Nutni di lqaεa, timucarin deg igenni. Ass-a, aγemγum i d-yeγlin idel tamurt, yeffer-iten γef yir tiṭ ar-a ten-id-iwalin. La-teddun ddaw laεnaya-s. Inig n webrid-a mačči d win n menwala.

Adiwenni d Aεmer Mezdad di La pêche de Kabylie :

http://www.depechedekabylie.com/read.php?id=55943&ed=MTgyMA==

Amegrad γef tsekla n Mezdad :

http://www.depechedekabylie.com/read.php?id=55942&ed=MTgyMA==