Dda Muqṛan Agawa
Ass n 12 deg ctember 2009, tensa tcemmaεt i d-yefkan tafat i yidles n teqbaylit s umeddeḥ ɣef ddin neɣ ttedkir, wagi d ccix Meqqran Agawa, d temkerḍit n tmedyazt n ddin s teqbaylit. Meqqran Agawa, isem-is aheqqani Waεli Muḥand Ameqqran, ilulu deg useggas 1929 deg taddart At Ɛṭelli deg temnaḍt n Larebεa n At Yiraten, anda yettwamḍel ass n lḥed 13 ctember 2009. Aṭas n yemdanen i d-yusan ɣer temḍelt-is deg yal tamnaḍt n tmurt iwakken ad t-ẓren i tikelt taneggarut, gar-asen icennayen, inaẓuren, imḍebbren n temnaḍt n Larebεa n At Yiraten d yimḍebbren n tenmehla n yidles n Tizi-Wezzu.
Dda Meqqran d anaẓur s wazal-is, yeğğa-d idles d tigejdit swayes ara tbedd tɣerma taqbaylit. Yesekles 11 tesfifin deg umecwar-is. Ccix Meqqran Agawa yessen aṭas n yinaẓuren iqburen gar-asen Sliman Ɛazem, ccix Lḥesnawi, Zezruqi Ɛellawa, Ṭaleb Rabaḥ d wiyaḍ-nniḍen. Yebda ccna asmi yesεa 15 yiseggasen deg leεmer-is. Seg yimiren yekcem deg lebḥer n tẓuri lqayen mačči d kra. Aseggas 1950, yekcem ɣer radyu n Bgayet anda i d-yekkes tamusni akked waṭas yinaẓuren-nniḍen n lawan-nni, am Ɛebdelwehhab Abjawi, ccix Sadeq, atg. Yelḥa-d akken amecwar almi d aseggas 1962 i yeḥbes axeddim deg radyu n Bgayet, labeεda imi medlent tewwura-ines i lebda. Agawa d isem swayes i as-sawalen yemdukal-is d wid ixeddem deg radyu. Isem-agi yekka-d deg lεerc Igawawen neɣ At Yiraten, anda i ilul.
Mi d-yeffeɣ Dda Meqqran deg radyu aseggas n 1962, yewwi abrid ɣer radyu taɣelnawt n teqbaylit aseggas n 1972, maca ur iεeṭṭel ara yeḥbes-d, dɣa deg yimiren yefren abrid n tẓuri s cnawi-ines d umeddeḥ ɣef ddin.
Ayen i d-yeğğa d agerruj ur nettkafa. Gar tezlatin yecna, “Larebεa tin iwumi zzin leswar”, d tajmilt i temnaḍt-is. Yecna daɣen ɣef cbaḥa n tmurt-is, ɣef ṣellaḥ, ɣef laxert. Dda Meqqran yedda aṭas ɣef temεemrin. Idum deg temεemmart n Sidi Ɛmar-Welḥağ i d-yezgan deg temnaḍt n Wizgan, anda yettmeddiḥ ilmend n tmeɣriwin n ddin am tεacurt, lmulud, leεyudat, remḍan, aggur ideg yewweḍ leεfu Rebbi.
Taɣbalut
Aucun commentaire:
Enregistrer un commentaire