lundi 18 mai 2009

Azerzour : ulac snat




Am tesfift tamezwarut iwumi isemma “tamɛayt”, am ccna “tamɛayt”, am tid i d-yernan deffir-s, ccna n ufennan Aẓerzur, d tin i d-yeffin asteqsi lqayen. Akken daɣen ara k-d-imudd tilawt (réalité) tesbur-d tuttra. Anda amseflid ur yettaki alamma yeqqar “ih, d tidett”.

Dacu i ẓriɣ

Dacu i ḥewseɣ

Dacu mi cfiɣ

(De)g ddunit dacu ɛaceɣ (Temẓi-w)

“Ulac snat”, d aḍebsi i d-ibubben 8 n ccnawi. Deg-sent isefruri-d awal ucennay ɣef waṭas n yisental, neɣ n tedyanin i aɣ-d-yezzin. Aẓerzur, seg wid yeddren tallit taberkant n lgirra n Lezzayer i d-yellan deg useggas 1954. Ula d netta teğğa-d deg-s later; teqqed-it. Teqqim-as d tallit i t-ijerḥen akken tejreḥ akk at tmurt.

Urgaɣ lɣaci yettgağğa

Lɣecc yezzi-d i tudrin

Urgaɣ idmaren i leεra

Ttqabalen tirsasin

Urgaɣ lbarud yeḥma

Lmut terwa tiɣratin

Isental n ccna n Uẓerzur, d wid i d-yettmuddun iɣallen d wid iɛerjen ɣef win i sen-d-yeslan. Tadyant-nsen tezdi d tin n umseflid. Aẓerzur yefka-yaɣ-d amedya n waya s wawalen i d-yenna :

Am tejra n uzemmur

Dacu i s-ttarran d amur

S uεekkaz i tt-id-ttmektayen

Am netta am tugett yifennanen, amedyaz Aẓerzur, ur yettu ara ad yerr tajmilt i yimɣewɣen-nneɣ. Gar-asen yella Lwennas :

A wi yulin ar Jerjer

Ar Jerjer ad inadi

Mkul aẓru ad s-yehder

Γef Lwennas ad t-yesteqsi

Ma yettu ad d-ifekker

Ayen yeḍran iḍelli

Tamedyazt-is, ur d-teffi aqḍaɛ n layas ɣef tlufa yecban amennuɣ n wul d bab-is. Fiḥel ma yettu yerna-d tameslayt i d-yettarran afud i usirem. Tameslayt ara d-yeldin tiwwura i lehna d talwit:

Tidett deg zik i tella

D lekdeb kan i d-yettnulfun

Am yiṭij teffer ccetwa

Yak d anebdu i d-iteddun

Am ass-a ad yexwu usigna

Ad ɣ-d-tbin tegnitt tesfa

Aẓerzur yecna ccna i d-yugmen lḥuman i wul. Lḥuman isefsin agris. Lḥuman ikersen iseqqan gar umdan d tmurt-is. Yerẓen asalu yebḍan gar uqcic d teqcict. Imejj yeslan i ccna n Uẓerẓur yecba win yeswan yekkes fad. Am win yeslan i ccix. Yehda-d deg-s tuɣac sway ara yedhu win yebɣan akken daɣen ara d-yendekwel uxemmem deg wayeḍ.

Tamuzigt sway d-ttwaṭerreẓ tmedyazt n uḍebsi “Ulac snat”, d tin imallen ɣer tewsit Gnawi. Ula d tarbaɛt i d-yefkan afus akken aḍebsi ad d-yezg deg wid i d-yufraren, ur cuḥḥen ara deg leqdic. Am Smail Belhaddad deg tmuzigt, neɣ Salim Bourihane amusnaw n tfermatukt, deg uheyyi n tteswira n uḍebsi.

Ait Ighil Mohand

Taɣbalut

Tamazight 18 magu 2009

Aucun commentaire: