Sɣuṛ Ait Ighil Mohand
Omar Fetmouche, seg wid i d-yufan taɣbalut ansa ara d-yagem ticeqqufin i umezgun. Yebda-tt s wungal fleuve détourné, yewwin aṭas warrazen, yuɣal-aɣ-d ɣer wungal Iɛessasen les Vigiles i yura Tahar Djaout. S leqdic-a Omar Fetmouche, s yisem n uxxam umezgun n Bgayet, yebɣa ad d-yerr tajmilt i Tahar Djaout d tsekla tazzayrit s umata d yineɣmasen s umata yeddren tasaɛett taberkant deg yiseggasen n 90.
Asentel n tceqquft Iɛessasen, d win n tedyant yeḍran d Lmeḥfuḍ Lemǧed, yiwen unelmad yekfan taɣuri. Yebda leqdic s usnulfu n yiwen uzeṭṭa d amguran (industriel). Anagar yekfa asnulfu, iseɛzel iman-is ɣer Sidi Mebruk, yiwet tɣiwant meẓẓiyen akken ad ibeɛɛed i lɣaci n Lezzayer tamanaɣt. Axxam yextar anda ara yili deg tɣiwant-a, d axxam, Baba ℇli, ur nezdiɣ deg wacḥal-aya. Iɛessasen n tɣiwant, Si Lmextar, Lemnewer d Skender, ttwalin tafat tettsiɣ am wass am yiḍ deg uxxam-a, bdan ttwillihen i unelmad izedɣen din. Anelmad yuḥwaǧ tadbelt akken ad d-yessufeɣ lkaɣeḍ i usnulfu-ines (certifier sa création). Imar kan bdan-d iɣilifen ttmiren-d fell-as. Iɛewwiqen-a, d iɛessasen i ten-id-ttgen. Ur yelli lxetyar ɣer unelmad. Teggra-yas-d anagar tawafɣa ɣer tmurt taberranit. Yeddem lqecc-is yerra ɣer Lalman. Dinna yufa ayen akk yessarem. Isem-is yuɣal mechur, deg yijernanen medkur. Iɛessasen ugden ɣef yiman-nsen. Limer adabu ad d-yawi lexber ɣef wasmi sɛeksen lecɣal ad xelsen ɣlay. Acu ara xedmen ? Xemmen, fran ad fken yiwen gar-sen d asfel. Ahcene Azazni, Rachid Mammria, Belkacem Kouane d kra gar yimdewlen yessulin awlelleɣ (rythme) n tceqquft. Akken daɣen i ssaɣen akk tiqerna n usayes. Saɛa saɛa, ad d-yali ssut n ucewwiq acawi neɣ ambiwel n ccḍeḥ. taggara n tceqquft, tella-d s ccna “Kenza” n Matub.
Taceqquft Iɛessasen, tebna s yilugan n tira tamezgunt tatrart. Ur tebḍa ara tifelwa neɣ d ixfawen. Tadlegt, iɛemmer-itt yiwen n uzeṭṭa meqqer i d-yebna Zaabouti. Tamuzigt sɣur Bazou.
S teɣzi n tsaɛett d 15 ddqayeq, imferǧen dhan. Asnulfu n umezgun s tsukkest seg wungalen uran Izzayriyen dayen ara idumen. Akka kra win i d-yesnulfan ad yaf iman-is. Ur iceṭṭeḥ i uderɣal.
Aucun commentaire:
Enregistrer un commentaire