Amerḍil n Yennayer

Yiwen webrid di lawan n yennayer yella ugeffur, adfel d usemmiḍ. Teḥbes taγaṭ agur kamel. Asmi ifuk wagur n yennayer, icerq-ed yiṭij, tekker cwiṭ n tizegzewt di tmurt. Ass nni teffeγ taγaṭ γer lexla, iεedjb-itt lḥal, tenna-yas i Yennayer : "ṭezẓek a εemmi yennayer, teffeγeḍ ur texdimed acemma." Akken yesla Yennayer i lehduṛ agi iqelε-d wul-is deg urfan, inna-yas i εemmis Fuṛaṛ :

"Ttxil-ek a εemmi Fuṛaṛ ,

reḍl-iyi yiwen wass di nnhaṛ

ad wteγ amaεiz bu lεaṛ

ad wteγ aqerru-s ar tmes."

Ireḍl-d Fuṛaṛ yiwen wass deg wussan-is. Imiren kan teččur tegnawt d asigna, teflali teṛεed, la tekkat lehwa abruri d wedfel ; aḍu la yettṛuzu ṭjuṛ. Imiren taγaṭ nni yellan di beṛṛa teqquṛ s usemmiḍ, temmut.
Γef anecta i yettusemma wass aneggaru n Yennayer d amerḍil : isεa wagur n Fuṛaṛ yiwen wass qell n wagguren nniḍen.
------------------------------------------------

Tamawt : ur cfiγ ara s teḥqiq ansi i d-kkseγ aḍris-agi. Ma yella ur di yeğğa ara Ṛebbi ad skiddbeγ seg usmel ayamun.