Taggara d ukkis seg wungal n Muḥand Ait Ighil, Tiγersi i d-yeffγen taggara-yagi . Ad tafem deg uṭṭun aneggau , wis 33 , n tesγunt ayamun.
ẓer dagi :
--------------
Taggara
Zdaxel tbaburt Tassili, iḥulfa s tmurt tettibɛid, maca mazal yettwali-tt, mazal aseɣwen yezga gar-asen, tezga gar wallen ur texfi. M tt-yessaɣ yiḍ, liḥala temgarad d tin n zgelli, lweḥc yerkeb ixef n Meẓyan, ma d agerbuz yezɣeb. Ɣas akken ur t-ixus wayra, taxxamt telha, učči yegget, maca tanumi yennum ulac-itt. Anaɣ qqaren imezwura: tuɛer tnumi. Tura yettḥulfu s kulci yettwexxir, ileḥḥu d tamendeffirt.
Axeddim yekfa, yekcem taxxamt, yerra ɣer tkemmust i d-yewwi, isenser-d yiwen ungal sway i d-yegla i tɣuri. Yextar-d ungal yura Jack London, yeḥmel aṭas aɣanib n tira n umaray, acku yettwessif-d tadlegt s taqqa, ur itettu kra.
Yeldi ungal, yebda taɣuri ur yestaḥla, ijerriden n tira mttuttlen gar-asen, s yiɣil i d-iferrez awalen yeɣar. Acḥal-aya ur yerkib tababurt, asderdef umutur yettlaḥaq-d d asawen, zzhir yenṭeḍ deg umeẓẓuɣ, lmil atan tikkelt ad izelmeḍ, tikkelt ad iyeffes, tikkelt ad yali uqacuc-is. Kra ur yerkid din.
Yeɛna-t-id yiwen uxeddam, yaɛqel Meẓyan yerwi:
D tikkelt tamezwarut?
Meẓyan yerra-yas-d « ih » s uqerruy-is, ur yezmir a d-isiwel. Axeddam-nni yewwi afus-is ɣer lǧib, yekkes-d yiwet tkacitt, yesmar-d yiwen lkas waman, yefka-ten i Meẓyan, yerna-yas-d azgen tqarest: « Su takacitt-a, a k-yenqes umlelli. »
Meẓyan yuɣ rray fiḥel awal.
Bihenfih, Meẓyan yekcem deg yiwen ugnir. Deg yixef-is tteswirat teddunt ttaqqalent. Mi truḥ yiwet ad tuɣal tayeḍ. Neɣ ahat d netta i tent-iɛennan. Ur yeẓri.
Imekta-d tudrin n tmurt Leqbayel. Ta tefser i yiṭij, ta teddari deg utelli, ta tebna, ta tedrem. Ta tersa deg tqintuct, tiɣilt ideg tezgiḍ a tt-twaliḍ, ta teffer zun tetturar tuqemca, ulac lexbar fell-as, mi tt-tettuḍ ad tbin.
Imekta-d lḥuma. Lḥuma i d-yekkan akkin i lebni, akkin i yimezdaɣ-is, akkin i lɣaci d-itekken syin. Lḥuma d anect-a akk, ugar aya, d aḥulfu d-yettdekwilen mi tezgiḍ berra.
Imekta-d Meqran Agawa, acu d-yerbeḥ deg wayen akk yexdem? Ma yebna-tt ɣef taggara i s-d-yegren iɣallen, tejleq-it tḥennek-it ɣur-s. Ɣer taggara-ya, yensa, iruḥ am netta am medden, ulac win d-yudren awal ɣef umezruy i d-yeǧǧa.
Imekta-d Ḥaman, jeddi-s win iwumi isawal baba Muḥu. tawaṭṭfa yeṭṭef deg lɛadat tiqdimin armi s-uɣalent d sebba n twaṭṭfa-ines daɣen deg tudert. Yes-sent i yeggan, yes-sent i d-yettakay. Ɣer taggara, wissen ma d-yili win ara inefɛen.
Imekta-d ussan yekka deg umennuɣ, yerbeḥ neɣ yexser? A d-yini yerbeḥ, acku yelmed iselmed, neɣ a d-yini yexser tagnit yekka akk din? Acku iwala ass yezrin ur d-yettuɣal. Ur yeẓri.
Imekta-d imeddukal-is, wid yezwaren ffɣen d wid yeqqimen. Anwi yugaren wiyiḍ? Ma yella ṭṭmeɛ n tuɣalin i wid yeffɣen neɣ n rrwaḥ i wid yeqqimen. Beṭṭu yezga dima.
Imekta-d yemma-s. Yemma-s-nni i t-isutren yiwet tikkelt a tt-yawi ɣer zzyara ɣer lemqam Sidi Ḥmed. Mi tt-isaweḍ yettu-tt din, qrib taɛreq. Mačči d yiwet i d-yernan fell-as, mazal tesber. A truḥ akka a tesibnen tagnitt, a d-yernu kra ara yesluɣen lecɣal.
Yedda deg tirga.
Yettnadi akkin,
Akkin i wayen ẓrant wallen,
Akkin i wayen yuɣen isem Axemmem,
Akkin i lebɣi saramen wulawen.
Yezga deg tallest,
Ifassen zwaren sferfuden,
Sikkiden deg umḍiq wallen,
Leḥḥun zwaren iḍarren.
Iḥulfa yes-sen nejbaden
Ɣef tfekka baɛden.
Ar tura, i d-mlalen d ilem.
Iḥulfa s lewhi yella,
Amḍiq ur t-yeǧǧi.
Anida-t? Yettnadi ur t-yufi.
Iḥulfa yis.
Ziɣen d timusniwin tiqdimin.
Yaɛqel s tewwura i s-d-ldint
Yaɛqel amḍiq acḥal yelḥa ɣef uḍar,
Yaɛqel isaffen, iɣezrawen yakk d tregwa,
Mačči abrid neɣ sin i ten-iḥewwes,
Mačči abrid neɣ sin i yeswa din,
Anaɣ itekkes fad dima dinna.
Acḥal tikkwal i d-yerza ɣer da,
Acḥal d tikkelt i tent-id-yufa.
Bih bih mi ɣbant tefra.
Yaɛqel llant i lebda,
Ma d timeẓriwt ur tent-yeẓẓar ara.
Iɣallen inejbaden, ur yeẓri tura,
Ur yefhim ma d nutni i d-inekmacen,
Neɣ d tafekka i iruḥen ɣur-sen.
Iḥulfa yes-sen refden-t.
Zdat-sent sersen-t.
Targit akka i tebda neɣ i tekfa.
Aucun commentaire:
Enregistrer un commentaire